Hövzə Xəbər Agentliyinin Hörmüzqan əyaləti üzrə müxbirinin verdiyi məlumata əsasən, Ayətullah Ərafi Rudan şəhərinin elmi hövzə müəllimləri və kadrları ilə keçirilən iclasda cənub vilayətlərində, xüsusilə Makran sahillərində maddi inkişafla mənəvi yüksəlişin vəhdətinin vacibliyini vurğulayıb. O bildirib ki, bu bölgə yeni düşüncələr və imkanlarla zəngindir, lakin bütün potensial imkanlara baxmayaraq məqsədli cihad və ciddi səylərə ehtiyac duyulur. Makran sahili Ali Məqamlı Rəhbərin təsvir etdiyi kimi, davamlı cihad və səylə böyük dəyişikliklərin mərkəzinə çevrilə bilər. Yüksək texnologiyalı sənayelərin inkişafı, dənizyönümlü xüsusi xidmətlər və beynəlxalq fəaliyyətlər bu əyaləti və onun şəhərlərini köklü şəkildə dəyişdirə, ölkənin gələcək investisiyalarının öncülünə çevirə bilər.
O əlavə edib ki, inkişaf yolu zəhmət və cihad tələb edir. Bu bölgə elm, mədəniyyət və beynəlxalq baxımdan böyük çiçəklənmə potensialına malikdir, lakin mövcud vəziyyət bu bölgənin sakinlərinə layiq deyil. Ümid olunur ki, məsul şəxslər, xalq və sərmayəçilər əl-ələ verərək yeddinci inkişaf proqramının yol xəritəsi əsasında irəliləyiş addımlarını atsınlar. Mövcud imkanlara söykənərək böyük işlər görmək mümkündür, lakin daha böyük işlər üçün mütləq lazımi infrastruktur da qurulmalıdır.
Elmi Hövzələrin Ali Şurasının üzvü maddi və mənəvi inkişafın əsas dayağını təhsil–tərbiyə, universitet və hövzədən ibarət üçbucaq kimi qiymətləndirərək bildirib ki, bu üç qurum cəmiyyətin dinamik inkişaf və tərəqqisinin əsas sütunlarıdır. Alim və ziyalılar cəmiyyət üçün inkişaf və yüksəlişin carçısı olmalıdır. Bu əyalətdə ortaq idea və fikirlər birgəyaşayış və həyatın əsas prinsipi olmalıdır.
Hicri-qəməri təqviminin son aylarında mənəviyyata gedən yol
Ayətullah Ərafi çıxışının davamında Rəcəb, Şaban və Ramazan aylarının mənəvi əhəmiyyətinə toxunaraq bildirib ki, hövzənin elmi sahəsi ilə yanaşı mənəvi yol və irfani süluk yolu da diqqətdə saxlanılmalıdır. Bunun bir hissəsi dua və münacatlarda təcəlli edir. Ayətullah Məliki Təbrizinin Əl-Muraqibat kitabında qeyd edildiyi kimi, bu üç ay insanın özünü tərbiyə etməsi və Allaha doğru mənəvi yolçuluğu üçün bənzərsiz və parlaq bir zamandır. Bunların iki tərəfi vardır: Hər kəsin başa düşdüyü görünən tərəf (təqvim) və insanlar üçün müxtəlif dərəcələrdə anlayış təmin edən mənəviyyat tərəfi.
O vurğulayıb ki, bu ayların həqiqətinə daxil olmaq hesab verməyi tələb edir və bu bitməz fürsətlərdən yararlanmağın açarı qəlbimizdədir və qəlbimizi isə ilahi zikrlər ilə genişləndirməliyik. Hörmətli tələbələr dünyəvi arzu və istəkləri kənara qoymalı və bəndə ilə yaradan arasında səmimi əlaqə yaratmalıdırlar. Bu yol övliyaların və məsumların yoludur. Kim bu kəşfi taparsa, digər yollar da onun üçün açılar. İmam Xomeyninin (r) əzəmət və heybəti məhz Şabaniyyə münacatı, Quranla ünsiyyət və gecə namazı idi. Bu ibadətlər ona elə bir mənəvi güc vermişdi ki, özü buyururdu: “Mən rəhbərlik üçün bir addım belə atmamışam.” Belə mənəvi təcrübələri dünyanın heç bir yerində əldə etmək mümkün deyil.
O əlavə edib: Bilməliyik ki, bir gün bu həyat səhnəsi qurtaracaq və karvanlar əbədiyyətə yönələcək. Bu ölüm bizim üçün özünü tərbiyə prosesində böyük bir dərsdir. Əgər Allahın nemətlərinə əyri baxışla baxsaq onu məhv edərik, amma əgər biz yaxşı olsaq, dünya da yaxşı və ilhamverici olacaq. Bu həqiqətə qayıtmağın yolu Şabaniyyə münacatı ilə ünsiyyət və dualarda rahatlıq tapmaqdır. Şabaniyyə münacatında dinin təlimləri əks olunur.
Ayətullah Ərafi qeyd edib: Hövzə, elm, nur və xalqa xidmətin həmçinin ilahi mənəviyyata malik birinci dərəcəli alimləri yetişdirən məkan olmalıdır. Xarici təsirlər vasitəsilə İran xalqının müasir tarixdəki böyük əzəmətinə xələl gətirməyə imkan verməməliyik. Gənc nəsil bilməlidir ki, bir addım geri çəkilmək bütün nailiyyətləri məhv edə bilər. Buna görə də dinə əsaslanaraq düzgün istiqamətdə addım atılmalıdır.
Xəbərin sonu
Rəyiniz